نئين يورپ جي جوڙجڪ لاءِ 21 نومبر 1990ع ۾ فرانس جي راڄڌاني پئرس ۾ اهم يورپي مُلڪن کانسواءِ آمريڪا، ڪئناڊا ۽سوويت يونين جي سڏايل سربراهي ڪانفرنس ۾ انهيءَ پڌرنامي تي صحيون ٿيون. هي چارٽر ”هيلسنڪي معاهدي“ جي نتيجي ۾ 1999ع ۾ تبديل ٿيل ”يورپي سلامتيءَ جي پڌرنامي“ مطابق عمل ۾ آيو. انهن ٻنهي دستاويزن جي نتيجي ۾ ”يورپي ملڪن جي سلامتي ۽ تعاون جي تنظيم“ (OSCE) قائم رکڻ لاءِ سهمتيءَ جو ماحول جُڙيو. جيتوڻيڪ انهن دستاويزن تي مڙني ميمبر ملڪن طرفان صحيون به نه ڪيون ويون هُيون. هي چارٽر، ڪميونزم جي زوال کان پوءِ اوڀر يورپ جي مُلڪن کي مغربي يورپ جي نظرياتي ڍانچي جي حصي بنائڻ جي سلسلي ۾ هڪ ڪارائتي ڪوشش سمجهيو وڃي ٿو. سندس اهميت جو اندازو ان مان لڳائي سگهجي ٿو ته هن دستاويز کي ”ورسيلز جي معاهدي“ (1919ع) ۽ ڪانگريس آف ويانا (1815ع) جيترو ئي اهم ڄاتو وڃي ٿو. پئرس امن ڪانفرنس ۽ برلن ڀت ڊهڻ جي نتيجي ۾ ”لوهي پردي“ جي خاتمي کان پوءِ يورپ ۾ نظرياتي متڀيد ۽ سياسي تڪرارن کي ختم ڪرڻ جي سلسلي ۾ هڪ اهم اڳڀرائي هُئي، جنهن جي نتيجي ۾ جمهوريت، آزاد معيشيت، بين الاقوامي قانون ۽ گهڻ پسنديءَ (Pluralism) وارن اصولن کي سوڀ ملي ۽ گڏيل قدرن ۽ قومي توڙي بين الاقوامي اصولن کي سموري يورپ ۾ پڻ مڃتا ملي. هن چارٽر جي ”جمهوري ادارن ۽ انساني حقن“ واري آفيس، وارسا (پولنڊ) ۾ ۽ ”تڪرارن کان بچاءَ وارو مرڪز ۽ سيڪريٽريٽ ويانا (آسٽريا) ۾ قائم ڪيا ويا. 1992ع ۾ تنظيم جو سيڪريٽري جنرل مقررڪيوويو ۽ اهو به طئي ڪيو ويو ته سياسي صلاح مشوري لاءِ ميمبر ملڪن جا پرڏيهي وزير وقت بوقت ملندا رهندا